Ushtruesja e detyrës së presidentes, Albulena Haxhiu, ka dënuar sulmin ndaj zëvendësministrit në detyrë të Financave, Hysni Mehanit, duke thënë se dhuna fizike në jetën publike është “cenim i drejtpërdrejtë i sigurisë së qytetarëve, i lirisë së veprimit politik dhe i vetë kulturës demokratike”.

“Dënoj ashpër sulmin fizik ndaj Hysni Mehanit, zëvendësministër, kandidat për deputet dhe kryetar i Qendrës së Lëvizjes Vetëvendosje! në Skenderaj”, është thënë në reagimin e Haxhiut.

Haxhiu ka thënë se “mandati publik nuk është strehë për arrogancë, as mburojë për forcë fizike ndaj kundërshtarit politik”.

Ajo i ka bërë thirrje organet e rendit të veprojnë ndaj “çdo personi të përfshirë” në këtë incident.

“Ftoj organet e rendit dhe institucionet përgjegjëse që të veprojnë menjëherë, me profesionalizëm dhe pa asnjë hezitim, në mënyrë që çdo person i përfshirë, të përballet me drejtësinë dhe të japë përgjegjësi para ligjit”.

“Hysni Mehanit i uroj shërim të shpejtë dhe rikthim sa më të shpejtë në angazhimet e tij publike.  Familjes së tij, bashkëpunëtorëve dhe qytetarëve u bëj thirrje për përmbajtje, qetësi dhe besim në institucionet e Republikës”, është thënë në reagimin e Haxhiut.