Trajneri i Barcelonës, Hansi Flick, ka mirëpritur mundësinë e një përballjeje me Jose Mourinhon në La Liga sezonin e ardhshëm, mes raportimeve se portugezi mund të rikthehet te Real Madridi.

Mourinho përflitet si kandidat për të marrë drejtimin e Real Madridit, një lëvizje që do të rikthente rivalitetin e zjarrtë në “El Clasico”, të ngjashëm me atë të fillimit të viteve 2010.

I pyetur për një duel të mundshëm me ish-trajnerin e Chelseat dhe Manchester Unitedit, Flick u shpreh i qetë dhe i vendosur. “Pse jo? Ai është trajneri i ekipit kundërshtar dhe unë jam gjithmonë gati të përballem me këdo”, deklaroi gjermani.

Deklaratat e tij erdhën pas humbjes 3-1 të Barcelonës ndaj Valencias në “Mestalla”, në ndeshjen e fundit të sezonit në La Liga. Megjithatë, Flick theksoi se rezultati nuk e zbeh sezonin e suksesshëm të katalanasve, të cilët e kishin siguruar më herët titullin kampion.

Trajneri pranoi se skuadra bëri gabime të lehta, por shtoi se vëmendja e disa lojtarëve mund të ketë qenë edhe te Botërori i ardhshëm, një objektiv i madh për çdo futbollist.

Me titullin tashmë të fituar, Barcelona pritet të fokusohet te përgatitjet për sezonin e ri, ndërsa Flick theksoi se do të analizojë me kujdes aspektet që duhet të përmirësohen për të ruajtur epërsinë ndaj rivalëve.