Kandidatja për deputete e PDK-së me numër 60, Besa Ismaili-Ahmeti, i është drejtuar me një mesazh qytetarëve të Mitrovicës, qytetit të saj të lindjes.

“Sot qëndroj para jush jo vetëm si kandidate për deputete, por mbi të gjitha si bijë e këtij qyteti krenar. E lindur dhe e rritur me vlerat e Mitrovicës, unë e njoh çdo sfidë, çdo ëndërr dhe çdo sakrificë të njerëzve tanë. Mitrovica nuk është thjesht një qytet. Ajo është zemra e qëndresës, e punës dhe e dinjitetit. Është qyteti i minatorëve të Trepçës, i studentëve, i punëtorëve dhe i familjeve që për dekada kanë mbajtur gjallë shpresën për një të ardhme më të mirë. Por ne e dimë se potenciali i Mitrovicës ende nuk është shfrytëzuar sa duhet. Shumë të rinj largohen në kërkim të mundësive, shumë familje përballen me vështirësi ekonomike dhe shumë projekte presin të realizohen. Pikërisht për këtë kam vendosur të kandidoj”, ka shkruar ajo në “Facebook”.

Ajo ka shtuar se beson se në një Mitrovicë ku të rinjtë kanë vende pune dhe perspektivë. “Unë besoj në një Mitrovicë ku të rinjtë kanë vende pune dhe perspektivë. Në një Mitrovicë ku gratë janë të fuqizuara dhe të përfaqësuara denjësisht. Si deputete, zëri im do të jetë zëri i Mitrovicës. Do të luftoj që interesat e qytetit tonë të jenë prioritet në çdo institucion. Do të jem pranë qytetarëve, duke dëgjuar shqetësimet e tyre dhe duke punuar për zgjidhje konkrete. Unë nuk vij t’ju premtoj mrekulli. Vij t’ju premtoj punë, përkushtim dhe ndershmëri. Vij t’ju premtoj se nuk do ta harroj kurrë prej nga vij dhe për kë punoj. Sot ju kërkoj besimin tuaj. Jo vetëm për mua, por për Kosovën. Sepse kur ecën përpara Mitrovica, ecën përpara e gjithë Kosova. Me krenari si bijë e Mitrovicës dhe me besim në të ardhmen tonë të përbashkët, ju ftoj të përkrahni kandidaturën time! Faleminderit! Zoti e bekoftë Mitrovicën dhe Kosovën!”, ka shkruar Ismaili-Ahmeti.