Anglia vazhdon marshimin drejt ëndrrës për titullin botëror, pasi në një përballje spektakolare dhe plot emocione mposhti Meksikën me rezultat 3:2 në “Estadio Azteca”, duke siguruar një vend në çerekfinalet e Kupës së Botës. Edhe pse luajti pjesën më të madhe të pjesës së dytë me një futbollist më pak, skuadra e Thomas Tuchel arriti ta ruajë epërsinë dhe ta zgjasë serinë pa humbje në shtatë ndeshje.

Pas një vonese prej një ore, ndeshja nisi me ritëm të lartë dhe me atmosferë elektrizuese në tribunat e stadiumit legjendar. Meksika ishte pranë avantazhit që në fillim, kur Raúl Jiménez provoi me kokë nga afërsia, por Jordan Pickford reagoi në mënyrë fantastike për ta mbajtur portën të paprekur.

Anglia u kundërpërgjigj pas pauzës për freskim, kur Anthony Gordon bëri një depërtim të mirë, por tentativa e tij u ndal nga portieri Raul Rangel.

Momenti vendimtar i pjesës së parë erdhi në minutën e 36-të. Bukayo Saka harkoi saktë në zonë, ndërsa Jude Bellingham realizoi me kokë për ta kaluar Anglinë në epërsi. Vetëm dy minuta më vonë, mesfushori anglez shënoi edhe golin e dytë personal, pasi u shërbye nga Harry Kane, duke regjistruar golin e tij të katërt në këtë Botëror, transmeton Klankosova.tv.

Megjithatë, Meksika nuk u dorëzua. Pak para përfundimit të pjesës së parë, Julián Quiñones shënoi për 2-1 me një goditje të fuqishme, duke rikthyer shpresat e vendasve. Sulmuesi me këtë gol u barazua si golashënuesi më i mirë i Meksikës në historinë e Kupës së Botës.

Skuadra meksikane ishte shumë pranë barazimit para pushimit, por Pickford realizoi edhe një pritje vendimtare ndaj një tjetër goditjeje me kokë të Jimenez.

Edhe pjesa e dytë nisi me dominimin e Anglisë, e cila ishte pranë golit të tretë kur goditja e devijuar e Nico O’Reilly u ndal nga shtylla.

Sfida mori një tjetër kthesë kur në minutat e para të pjesës së dytë Jarell Quansah u ndëshkua me karton të kuq direkt, pas rishikimit të aksionit nga VAR-i për një ndërhyrje të rrezikshme.

Pavarësisht inferioritetit numerik, “Tre Luanët” rikthyen epërsinë prej dy golash në minutën e 60-të. Anthony Gordon fitoi penallti pas ndërhyrjes së portierit Raúl Rangel, ndërsa Harry Kane u tregua i saktë nga pika e bardhë për rezultatin 3-1.

Drama vazhdoi edhe më tej. Pas një tjetër ndërhyrjeje të VAR-it, këtë herë për një faull të Kane në zonë, Meksika fitoi penallti. Raúl Jiménez nuk gaboi nga 11 metra dhe ngushtoi rezultatin në 3:2, duke i dhënë fund ndeshjes një tjetër dozë emocionesh.

Në minutat e fundit, Meksika ushtroi presion të madh në kërkim të barazimit, por mbrojtja angleze rezistoi deri në fishkëllimën e fundit, duke vulosur kualifikimin në çerekfinale.

Në fazën e ardhshme, Anglia do të përballet me Norvegjinë të shtunën në “Miami Stadium”, ndërsa vazhdon rrugëtimin drejt trofeut të parë madhor pas 60 vitesh.

Në anën tjetër, eliminimi i dha fund serisë prej 12 ndeshjesh pa humbje të Meksikës, e cila vazhdon të presë rikthimin në çerekfinalet e Kupës së Botës, një arritje që i mungon që nga Botërori i vitit 1986.