Ministrja në detyrë e Ekonomisë, Artane Rizvanolli, ka njoftuar se Korporata Energjetike e Kosovës (KEK) do të eksportojë thëngjill në Maqedoninë e Veriut për një periudhë trevjeçare.

Sipas Rizvanollit, vlera e eksportit mund të arrijë deri në 73.2 milionë euro. Për herë të parë, kontrata është lidhur drejtpërdrejt ndërmjet dy kompanive publike, KEK dhe ESM, pa ndërmjetësues. “Përgjatë 3 viteve, KEK-u do të eksportojë deri në 73.2 milionë Euro thëngjill në Maqedoni të Veriut. Për herë të parë, kontrata është bërë mes dy kompanive publike, KEK dhe ESM. Çmimi prej 24.4 euro për ton, pa TVSH, është shumëfish më i favorshëm për KEK-un në krahasim me kontratat e kaluara që bëheshin përmes ndërmjetësuesve. Për shembull, herën e fundit që Kosova ka eksportuar në Maqedoni të Veriut, KEK-u e ka shitur thëngjillin në një tender të jashtëligjshëm me çmim prej vetëm 8 euro, duke përfshirë tantiemën prej 3 euro dhe TVSh-në prej 18 për qind. Prodhimi i energjisë elektrike në Kosovë nuk ndikohet në asnjë mënyrë nga kjo kontratë, duke qenë se ESM është përgjegjëse për eskavimin dhe transportin e thëngjillit që do ta blejë”, ka njoftuar Rizvanolli.