Shtetet e Bashkuara dhe Irani kanë rifilluar sulmet ushtarake për herë të parë pas disa javësh, duke rritur sërish tensionet në Lindjen e Mesme.

Forcat amerikane kanë goditur dy raketahedhës iranianë në ishullin Larak. Sipas një zyrtari amerikan, forcat e Gardës Revolucionare po përgatiteshin të vendosnin mina detare në Ngushticën e Hormuzit.

Irani është kundërpërgjigjur duke lëshuar raketa balistike drejt dy bazave amerikane në Jordani. Ushtria jordaneze njoftoi se kishte kapur tetë raketa që kishin hyrë në hapësirën ajrore të vendit.

Ushtria iraniane pretendoi gjithashtu se kishte sulmuar me dronë bazën ajrore Al Minhad në Emiratet e Bashkuara Arabe, ku, sipas saj, ndodheshin forca dhe helikopterë amerikanë. Nga Emiratet dhe Komanda Qendrore Amerikane nuk pati reagim të menjëhershëm.

Garda Revolucionare deklaroi se ka rrëzuar edhe një dron amerikan MQ-9 mbi Ngushticën e Hormuzit, por pretendimi nuk është konfirmuar në mënyrë të pavarur.

Ndërkohë, televizioni shtetëror iranian raportoi se një supertanker është përfshirë nga zjarri dhe ka mbetur i bllokuar pasi është goditur nga dy mina detare në jug të Hormuzit. Identiteti i anijes dhe gjendja e ekuipazhit nuk janë bërë të ditura.

Presidenti amerikan Donald Trump deklaroi se ishulli Kharg, një qendër kyçe energjetike e Iranit, po sulmohej. Megjithatë, deri më tani nuk ka pasur konfirmime të tjera për një sulm në këtë ishull.

Të dhënat e transportit detar tregojnë se numri i anijeve të mallrave që kalojnë nëpër Hormuz ka rënë në vetëm pesë në ditë, ndërsa disa anije besohet se i kanë fikur sistemet e identifikimit për t’iu shmangur sulmeve.