Kryetari i komunës së Mitrovicës, Faton Peci, ka njoftuar se po vazhdojnë me intensitet të lartë investimet në infrastrukturën rrugore të Shalës.

Sipas Pecit, punimet aktualisht janë duke u zhvilluar në fshatrat Kutlloc, Rashan dhe Bajgorë, ndërsa në fazën e dytë të projektit pritet të përfshihen edhe Kaçandolli, Maxhera, Batahir, Dedi dhe Ofqarë.

Për përmirësimin e infrastrukturës rrugore në këtë zonë janë paraparë investime në vlerë prej 6 milionë eurosh.

Këto investime, sipas Komunës, synojnë përmirësimin e lidhjeve rrugore dhe krijimin e kushteve më të mira për zhvillimin e kësaj zone.

“Shala e harruar po e merr vëmendjen e merituar”, ka theksuar Peci.