Në Qendrën Ndërkombëtare të Trajnimit për Kërkim-Shpëtim (QNTKSH), në kuadër të Komandës së Gardës Kombëtare, FSK-ja ka përfunduar trajnimin e avancuar për Kërkim-Shpëtim, i cili kishte për qëllim avancimin e njohurive dhe aftësive profesionale të pjesëtarëve në operacionet e kërkim-shpëtimit.

Trajnimi dyjavor ka përfshirë një program të avancuar teorik dhe praktik, me fokus në teknikat e specializuara për operim në terrene të vështira dhe në situata emergjente.

Sipas njoftimit, gjatë trajnimit, pjesëmarrësit kanë zhvilluar njohuri dhe aftësi në fusha të ndryshme, përfshirë lidhjet dhe sistemet e ankorimit, boltimet, sistemet e litarëve, evakuimin e viktimave, teknikat e alpinizmit, si dhe procedura të tjera të rëndësishme për operacionet e kërkim-shpëtimit.

Në përmbyllje të programit është zhvilluar një ushtrim 72-orësh në zonën e Rugovës. Gjatë këtij ushtrimi, pjesëmarrësit kanë zbatuar në praktikë, në kushte të simuluara operacionale, njohuritë dhe teknikat e fituara gjatë trajnimit.

Ushtrimi ka pasur për qëllim vlerësimin e aftësive individuale dhe ekipore, koordinimin në terren dhe reagimin ndaj skenarëve të ndryshëm të kërkim-shpëtimit.

Në përfundim të trajnimit, 16 pjesëtarë janë certifikuar me sukses, duke përmbyllur një program intensiv të përgatitjes profesionale dhe praktike.