Kryeministri i Shqipërisë, Edi Rama, ka reaguar lidhur me hetimin që po zhvillohet ndaj ish-drejtoreshës së SHISH-it, Vlora Hysenit, duke kritikuar mënyrën se si, sipas tij, është administruar rasti nga SPAK-u.

“Pas vendosjes së masës së arrestit shtëpiak për ish-drejtuesen e SHISH-it, kërkova një adresim të menjëhershëm. Ishte pa diskutim një masë e skajshme, por të mbajmë parasysh se bëhet fjalë për ekspozimin e një institucioni kyç për shtetin. Çdo dyshim i arsyeshëm duhet të hetohet deri në fund, çdo akuzë duhet të provohet ose të rrëzohet përmes një procesi të parashikuar dhe të rregullt. Çdo masë kufizimi e lirisë nga organi i akuzës për cilindo që ka imunitet parlamentar kundërshtohet vetëm në gjykatë. Këto pika ndaj çështjeve individuale të drejtësisë kanë qenë dhe mbeten kështu. Respekti për pavarësinë nuk do të thotë heshtje edhe kur një shqetësim parimor shfaqet. Konkretisht, në këtë rast, përveç dhe përtej çështjes penale individuale, ka një fakt tjetër parimor që nuk mund të anashkalohet sikur s’ka ndodhur”.

“Gjatë marrjes së masës dhe administrimit të dosjes, një institucion u ekspozua ndaj potencialit për një dëm të madh që duhej të ishte parandaluar. U lejua që të dhënat e dosjes të vërshonin nëpër kanale dhe tezga mediatike përpara se gjykata të urdhëronte kufizimin e publikimit të tyre, pa asnjë sukses. Ky nuk është problem i një pushteti të pavarur, është i krejt shtetit. Prandaj, kjo qasje e lëshuar si pa kujdes i ka lënë pa fjalë edhe partnerët tanë. Nuk është me siguri hera e parë që shefi i një shërbimi sekret merret i pandehur, por është hera e parë në historinë e botës që institucioni i SHISH-it bëhet target ndërkombëtar e kombëtar thashethemesh, për shkak të mosmarrjes së asnjë prej atyre masave që shtetet marrin në një rast të tillë”, ka thënë Rama.

Kujtojmë se më 22 shtator, GjKKO-ja, me kërkesë të SPAK-ut, ka lëshuar urdhër për ekzekutimin e masës së sigurisë “arrest shtëpie” dhe “pezullim nga detyra” për tashmë ish-drejtoreshën e SHISH-it, Vlora Hyseni. Kjo e fundit akuzohet për veprat penale “nxjerrje të sekretit shtetëror” dhe “përkrahje të autorit të krimit” në kuadër të hetimeve për AKSHI-n.

Referuar SPAK-ut, Hyseni ka ndihmuar me informacione sekrete Ergys Agasin, gjatë kohës që ky i fundit ishte i shpallur në kërkim. Agasi është arrestuar më 26 gusht, i dyshuar si kreu i një grupi të strukturuar kriminal në aferën e AKSHI-t.

Nga OKB-ja, Rama ka kërkuar shkarkimin e menjëhershëm të Vlora Hysenit, ndërsa kompetencat e drejtimit të SHISH-it ia ka kaluar Elvis Lilës.

Rasti i Hysenit mund të konsiderohet si një prej çështjeve më të rëndësishme që kanë prekur sigurinë kombëtare. Vetë SPAK-u ka theksuar se drejtoresha e SHISH-it ka shërbyer në ndihmë të krimit të organizuar. /tvklan.al