Deputetja e LDK-së, Vjosa Osmani, ka përgëzuar pjesëtarët e Forcës së Sigurisë së Kosovës (FSK) për sukseset e fundit në garat ndërkombëtare, duke vlerësuar medaljen e artë në “Cambrian Patrol” dhe vendin e dytë në garën “Ushtari më i mirë”, të zhvilluar në Iowa të ShBA-së.

Përmes një postimi në “Facebook”, Osmani ka theksuar se FSK-ja ka dëshmuar edhe një herë përgatitjen dhe profesionalizmin e saj në mesin e ekipeve ushtarake nga vende të ndryshme të botës.

“Ari për FSK-në, krenari për Kosovën!”, ka shkruar ajo.

Sipas saj, medalja e artë në garën “Cambrian Patrol”, e fituar para pak ditësh, është dëshmi e aftësive, disiplinës dhe përkushtimit të pjesëtarëve të ushtrisë së Kosovës.

Osmani ka vlerësuar gjithashtu rezultatet e arritura nga pjesëtarët e FSK-së në garën “Ushtari më i mirë”, të zhvilluar në shtetin e Iowa-s në ShBA, ku ata kanë zënë vendin e dytë.

Ish-presidentja i ka uruar ushtarakët për sukseset e arritura, duke shprehur krenarinë për ta dhe për Kosovën.

“Urime ushtarakëve tanë! Krenarë me ju, krenarë me Kosovën”, ka shkruar Osmani.