Trajneri i Bayern Munichut, Vincent Kompany, ka dalë nga spitali, ka konfirmuar të mërkurën asistenti i tij, Aaron Danks, pesë ditë pasi humbi ndjenjat gjatë një seance stërvitore.

Kompany po ndiqte një seancë stërvitore të ekipit rezervë të klubit kur ndodhi incidenti, të premten e kaluar.

Duke folur pas fitores 6:1 të Bayernit ndaj Magdeburgut në Kupën e Gjermanisë, Danks ka thënë se ende nuk ka një datë konkrete për rikthimin e Kompanyt në punë.

“Është padyshim një hap vërtet pozitiv në rrugën e tij drejt rikuperimit”, ka thënë Danks lidhur me daljen e Kompanyt nga spitali.

“Ai mund të kthehet në shtëpi tani, të jetë më afër familjes së tij dhe të ndihet më rehat në shtëpinë e tij, por është ende shumë e rëndësishme që të pushojë dhe të shërohet”, ka shtuar ai.

Danks ka bërë të ditur se nuk ka folur me Kompanyn prej disa ditësh.

“Shëndeti i tij është përparësia jonë numër një dhe ai është ende në fazën e rikuperimit. Prandaj, duam që ai të rikuperohet plotësisht, të jetë në formë të plotë fizike dhe më pas të na bashkohet”, ka thënë Danks.