Sipas njoftimit të Policisë, dyshohet se ngjarja ka ndodhur brenda familjes, ndërsa personi i arrestuar është babai i viktimës mashkull.

I dyshuari, 65-vjeçar, është ndaluar për 48 orë me vendim të prokurorit.

Rasti ishte raportuar më 1 nëntor, rreth orës 08:47, kur Policia kishte pranuar informacion për dy trupa të pajetë në një shtëpi në Demiraj. Viktimat janë një person i gjinisë mashkullore, i lindur më 1999, dhe një foshnjë.

Në vendin e ngjarjes kishin dalë njësitet policore, Prokurori i Shtetit dhe ekipi emergjent mjekësor, ku ishte konstatuar vdekja e të dy personave.

Policia ka bërë të ditur se rasti është cilësuar si “Vrasje e rëndë”, ndërsa trupat e pajetë, me vendim të prokurorit, janë dërguar në Institutin e Mjekësisë Ligjore në Prishtinë për obduksion.

Hetimet po vazhdojnë në koordinim me Prokurorinë për zbardhjen e plotë të rrethanave të rastit.

Njoftimi i plotë i policisë:

“Arrestohet personi i dyshuar lidhur me rastin ‘vrasje e rëndë’

Më 01.11.2026 rreth orës 08:47, Policia e Kosovës ka pranuar informacion se në një shtëpi në fshatin Demiraj të komunës së Gjilanit, dyshohet për dy trupa të pajetë, një person i gjinisë mashkullore i vitit të lindjes 1999 dhe një foshnjë.

Me urgjencë në vendin e ngjarjes kanë dalë njësitet përkatëse policore, prokurori i Shtetit dhe ekipi emergjent mjekësor, ku nga mjeku kujdestar është konstatuar se të dy personat janë pa shenja jete.

Nga hetimet e para në vendin e ngjarjes, dyshohet se incidenti ka ndodhur brenda familjes, ku në cilësinë e personit të dyshuar është arrestuar babai i viktimës (gjashtëdhjetë e pesë vjeçar), i cili me vendim të prokurorit është ndaluar për 48 orë.

Në bashkëpunim me prokurorin e Shtetit janë duke u ndërmarrë të gjitha veprimet e nevojshme operative dhe hetimore për ndriçimin dhe sqarimin e plotë të rrethanave të rastit, i cili është cilësuar si ‘vrasje e rëndë’

Me vendim të prokurorit të Shtetit trupat e pajetë dërgohen në Institutin e Mjekësisë Ligjore në Prishtinë për obduksion.

Policia e Kosovës, në bashkëpunim dhe në koordinim me Prokurorinë, mbesin të përkushtuar në hetimin dhe trajtimin profesional të rastit.”