Presidentja e Kosovës, Justina Shiroka-Pula, ka pritur në takim ministrin e Punëve të Jashtme të Zvicrës dhe njëherësh kryesuesin e OSBE-së, Ignazio Cassis.

Gjatë takimit, Shiroka-Pula ka vlerësuar marrëdhëniet e shkëlqyera ndërmjet Kosovës dhe Zvicrës, duke e falënderuar ministrin Cassis për mbështetjen e vazhdueshme të shtetit zviceran ndaj Kosovës.

Ajo ka theksuar rëndësinë e thellimit të mëtejmë të marrëdhënieve ekonomike, rritjes së shkëmbimeve tregtare dhe shtimit të investimeve zvicerane në Kosovë.

Shiroka-Pula ka vlerësuar bilancin pozitiv tregtar ndërmjet dy vendeve, por ka theksuar se ekziston potencial për rritjen e mëtejshme të tij, përmes mundësive që ofron Asociacioni Evropian i Tregtisë së Lirë (EFTA).

Presidentja ka nënvizuar gjithashtu nevojën për vazhdimin e mbështetjes së Zvicrës në fuqizimin e pozitës së Kosovës në arenën ndërkombëtare dhe në procesin e anëtarësimit në organizatat ndërkombëtare.

Në këtë kontekst, ajo ka vënë në pah rëndësinë e mërgatës shqiptare, e cila kontribuon aktivisht në Zvicër dhe përbën një urë të fuqishme lidhëse ndërmjet dy shteteve.

Shiroka-Pula ka shprehur mirënjohjen edhe për angazhimin e kontingjentit zviceran të KFOR-it në Kosovë që nga viti 1999.

Nga ana e tij, ministri Cassis ka rikonfirmuar se Zvicra do të vazhdojë ta mbështesë Kosovën edhe në të ardhmen, duke shprehur përkrahjen e tij edhe për presidenten Shiroka-Pula.