Nga Astrit Buja

Shala e Lipjanit po bëhet pjesë e një projekti të veçantë, që ndërthur historinë, krenarinë kombëtare dhe kujtesën kolektive të popullit tonë.

Gjatë vizitës së sotme në punishten ku po punohet për realizimin e Emblemës së Ushtrisë Çlirimtare të Kosovës (UÇK), pata rastin të shoh nga afër punën, përkushtimin dhe angazhimin për realizimin e këtij simboli me rëndësi të veçantë historike e kombëtare.

Emblema e UÇK-së do të ketë përmasa prej 10 metrash gjerësi dhe 10 metrash lartësi. Ajo do të punohet në të dyja anët, me ndriçim të veçantë, duke u shndërruar në një simbol madhështor të krenarisë, sakrificës dhe kujtesës sonë kombëtare. Ky projekt do të realizohet për herë të parë në Kosovë, pikërisht në Shalë të Lipjanit.

Por ky projekt nuk do të jetë vetëm një simbol përkujtimor. Hapësira përreth tij do të shërbejë edhe si një ambient i përshtatshëm për organizimin e aktiviteteve të ndryshme kulturore, artistike, rinore dhe përkujtimore.

Projekti parasheh gjithashtu ndërtimin e ulëseve të strukturuara në formë amfiteatri, duke krijuar kushte për pjesëmarrjen e qytetarëve dhe zhvillimin e aktiviteteve të ndryshme. Në këtë mënyrë, Shala do të fitojë një hapësirë të re publike, ku historia, kultura dhe jeta shoqërore do të ndërthuren në një vend të vetëm.

Komuna e Lipjanit, nën udhëheqjen e kryetarit z. Imri Ahmeti, ka dëshmuar vazhdimisht përkushtim ndaj ruajtjes dhe nderimit të historisë sonë kombëtare. Krahas këtij projekti, në komunë janë ngritur shtatore të shumta në nderim të dëshmorëve, janë mbështetur projekte të rëndësishme që lidhen me historinë dhe lavdinë e UÇK-së, ndërsa qyteti i Lipjanit tashmë ka edhe shtatoren e Komandantit Legjendar, Adem Jashari.

Në këtë frymë përkushtimi bën pjesë edhe Kulla Muze në Krojmir, një projekt me rëndësi të veçantë për ruajtjen e trashëgimisë historike dhe të kujtesës së Luftës Çlirimtare, i cili tashmë është afër përfundimit.

Të gjitha këto projekte dëshmojnë përkushtimin institucional të Kryetarit të Komunës, z. Imri Ahmeti, për ruajtjen e historisë, nderimin e sakrificës së dëshmorëve dhe përcjelljen te brezat e ardhshëm të vlerave mbi të cilat u ndërtua liria jonë.

Është e rëndësishme që historia jonë të mos mbetet vetëm në libra apo në kujtimet tona. Ajo duhet të jetë e pranishme në hapësirat tona publike, në monumentet përkujtimore dhe në edukimin e brezave të rinj. Vetëm kështu sigurojmë që sakrifica e atyre që dhanë gjithçka për lirinë e Kosovës të mos harrohet kurrë.

Historia nuk duhet vetëm të kujtohet; ajo duhet të ruhet, të nderohet dhe të përcillet brez pas brezi!

Lavdi e përjetshme dëshmorëve të kombit dhe të gjithë atyre që sakrifikuan për lirinë e Kosovës!