Në qytetin e Huanan në Kinë, një nuse e re po jetonte ditën më të lumtur të jetës së saj. Dasma ishte madhështore, salla ishte e mbushur plot me të ftuar nga ana e dhëndrit, dhe gjithçka dukej si në përralla.

Por ndërsa ceremonia po vazhdonte dhe të ftuarit po hanin e po festonin, nusja filloi të vinte re disa sjellje të çuditshme te njerëzit që prezantoheshin si “kushërinjtë”, “shokët e fëmijërisë” dhe “kolegët e punës” së burrit të saj.

Kur u afrua te tavolinat e tyre për t’i përshëndetur dhe i pyeti se si ishin njohur me dhëndrin, përgjigjet e tyre ishin të paqarta dhe shpesh binin ndesh me njëra-tjetrën. Dikush nuk ia dinte as emrin e saktë të qytetit ku kishin rritur, ndërsa një tjetër u hutua kur u pyet për familjen e tij.

E dyshuar, nusja i kërkoi sqarime dhëndrit në mes të dasmës, por ai u mundua ta kalonte situatën me shaka. Vetëm kur njëri prej “miqve” u largua nga salla dhe dikush nga familja e nuses e pyeti drejtpërdrejt nëse e njihte vërtet dhëndrin, e vërteta shpërtheu si bombë.

Asnjëri nga ata 200 të ftuar nuk e kishte parë kurrë më parë dhëndrin në jetën e tij. Ai kishte paguar një agjenci dhe mbi 200 njerëz të panjohur në internet – secilin nga rreth 15 deri në 50 dollarë – që të visheshin bukur, të vinin në dasmë dhe të shtireshin si miqtë dhe të afërmit e tij të pasur.

Arsyeja ishte sa e dhimbshme aq edhe absurde: dhëndri kishte ardhur nga një familje e varfër dhe kishte frikë se familja e nuses nuk do ta pranonte nëse do ta merrnin vesh se ai nuk kishte rreth shoqëror të madh apo pozita të larta. Por në vend që të fitonte respektin e tyre, gënjeshtra e tij e ktheu dasmën në një skandal që bëri xhiron e botës.