Zyrtarët në Ministrinë e Forcës së Sigurisë së Kosovës (MFSK) dhe pjesëtarët e FSK-së të mërkurën kanë dhuruar gjak në ambientet e MFSK-së.

Këtë aktivitet e ka organizuar Qendra Kombëtare e Kosovës për Transfuzion të Gjakut (QKKTGj) bashkë me Departamentin e mjekësisë së FSK-së.

Ushtruesja e detyrës së drejtoreshës së QKKTGj-së, Bukurie Zhubi, ka thënë se pjesëtarët e FSK-së janë bërë shembull i mirë për të ndihmuar qytetarët e Kosovës dhe për ngritjen e vetëdijes tek qytetarët që t’i përgjigjen aksionit humanitar për dhurimin e gjakut.

Bashkë me pjesëtarët e FSK-së gjak ka dhënë edhe zëvendësministri i MFSK-së, Burim Ramadani. Ai ka deklaruar se FSK-ja gjithmonë i përgjigjet jo vetëm aksioneve të organizuara për dhurim të gjakut, por edhe sa herë që ka nevojë dhe thirrje për ndihmë për të dhuruar gjak.