Deputetja e Kuvendit të Kosovës nga radhët e PDK-së, Besa Ismaili, ka reaguar në lidhje me intervistën e Vjosa Osmanit dhënë mbrëmë në televizionin KTV, e cila e ka akuzuar për shumë gjëra negative që kanë ndodhur në Kosovë subjektin politik të znj. Ismaili.

“E tërë karriera politike e znj. Vjosa Osmanit është ndërtuar me gjuhë politike kundër PDK-së dhe vrerëhedhje mbi Hashim Thaçin”, ka shkruar Ismaili në një postim në faqen e saj në “Facebook”.

Shkrimi i Besa Ismailit:

E tërë karriera politike e znj. Vjosa Osmanit është ndërtuar me gjuhë politike kundër PDK-së dhe vrerëhedhje mbi Hashim Thaçin! Ndërsa gjatë muajve të fundit, e kemi parë teksa shumë e ka përdorur edhe Albin Kurtin për të promovuar veprimtarinë e saj politike, për një koalicion që edhe ajo ishte e bindur se do të dështonte.

Përsëri metodologji e njëjtë, dhe tash ata që i dhanë mbështetjen për kandidate për kryeministre, së paku kështu u vetëdeklarua, përnjëherë qenkan jo të duhur për kabinet qeveritar. Të gjitha këto për më pak se gjysmë viti. A e meritojnë qytetarët këtë shpërputhje dhe përfitim elektoral, në një anë “guxim ndaj krimit” në anën tjetër, viktimizim?