Në Shqipëri, ambasadorja amerikane Yuri Kim ka thënë të premten se shteti ligjor duhet të mbizotërojë dhe se askush nuk mund të jetë mbi ligjin.

Ajo i bëri këto komente për gazetarët në Vlorë, derisa u pyet rreth situatës në lidhje me vendimin e Departamentetit amerikan të Shtetit ndaj ish kryeministrit Sali Berisha.

Ky i fundit ka deklaruar një ditë më parë se do të ngrinte padi ndaj Sekretarit amerikan të Shtetit Antony Blinken, pranë një gjykate franceze, por ekspertë ligjorë ngrejnë dyshime mbi juridikionin e saj ndaj një çështjeje të tillë.

Eksperti amerikan i së drejtës ndërkombëtare Paul Williams, profesor në Fakultetin e Drejtësisë në Universitetin Amerikan në Uashington, i tha “Zërit të Amerikës” se: “Sekretari i Shtetit Tony Blinken gëzon imunitet për veprimet zyrtare. Në Shtetet e Bashkuara, gjykatat nuk ndërhyjnë në politikën e jashtme. Nuk e di se çfarë do të thoshin gjykatat franceze, përveçse që kjo është një mosmarrëveshje midis një jo-shtetasi dhe një shteti të huaj, kështu që ata nuk do të kishin juridiksion mbi një çështje të tillë”, ka thënë Williams.