Kryetari i Kuvendit, Glauk Konjufca, do të udhëtojë sot për Hagë. Ai pritet t’i takojë ish-krerët e Ushtrisë Çlirimtare të Kosovës.

“Bashkë me kryeparlamentarin Konjufca më 17 qershor udhëtojmë për t’i vizituar ish-krerët e UÇK-së në Hagë”, ka njoftuar këshilltari i Konjufcës, Ilir Kërçeli.

Para disa ditësh Konjufca tha se Specialja po ua shkel të drejtat ish-krerëve të UÇK-së.

“Shkojmë si institucione që përfaqësojmë republikën tonë. Shkojmë që të shohim si trajtohen. Duket qartë se në disa aspekte ata apo shkelin të drejtat e tyre. Ata po i afrohen kohës 2-vjeçare të paraburgimit dhe s’është bërë asgjë. Nuk u është siguruar as mbrojtja e tyre në liri. Jemi të shqetësuar si institucione. Do flasim me zotërinjtë Thaçi, Selimi, Krasniqi dhe Veseli për këto çështje”, ka deklaruar Konjufca.