Nënkryetarja e Partisë Demokratike të Kosovës (PDK), Vlora Çitaku, ka kërkuar nga presidentja Vjosa Osmani të deklarohet për qëndrimin e saj rreth qasjes së kryeministrit Albin Kurtit ndaj marrëdhënieve me ShBA-në.

Çitaku ia ka kujtuar Osmanit dhe Kurtit se Kosova është çliruar në koordinim me aleatët.

“Se nuk ka asnjë koordinim me ShBA-të tashmë është e ditur botërisht. Seanca e Këshillit të Sigurimit shpërfaqi në formën më brutale këtë mos-koordinim.

Dhe për çka? Për dinarë e fletushka.  Ky popull e ky vend, në koordinim me aleatët ka larguar tanket serbe. Është çliruar, është pavarësuar. Është njohur nga mbi 100 shtete.  Është momenti i fundit që presidentja, si bartëse e politikës së jashtme të deklarohet publikisht, a e mbështetë kursin konfrontues të Kurtit, apo mendon ndryshe.  Fol presidente, kësaj radhe, heshtja nuk është flori”, ka shkruar Çitaku në “Facebook”.

Reagimi i Çitakut ka ardhur pas kritikave të ashpra të zyrtarit të lartë amerikan, James O’Brien në adresë të qeverisë Kurti.