Kryetari i Lidhjes Demokratike të Kosovës (LDK), Lumir Abdixhiku, ka pritur në takim në zyrat e partisë që drejton, ambasadorin e ri britanik në Kosovë, Jonathan Hargreaves.

“Ambasadorin Hargreaves e falënderova për rolin dhe kontributin e vazhdueshëm të Mbretërisë së Bashkuar  – në veçanti në fushën e sigurisë, gjatë viteve e dekadave të shkuara. Raportet e shkëlqyera në mes të dy vendeve tona janë garanci për të ardhmen e Republikës dhe popullit tonë”.

“ Ambasadorin e njoftova po ashtu mbi programin politik ‘Rruga e Re’, projektet kryesore zhvillimore; si dhe misionin tonë euroatlantik si fondament i orientimit tonë ideologjik”.

“Ambasadorit Hargreaves i urova shëndet dhe qëndrim  me plot suksese në Republikën e Kosovës. I sigurova partneritet të plotë brenda Lidhjes Demokratike të Kosovës në këtë rrugëtim të rij të tij. Punë të mbarë ambasador”, ka shkruar Abdixhiku në “Facebook”.

I dërguari i ri i Londrës në Kosovë, Jonathan Hargreaves e ka marrë detyrën gjatë javës së kaluar.