Akademik Hamiti boton libër të ri studimor, këtë herë monografi për Naim Frashërin

16 tetor 11:24

“Naim Frashëri” është libri më i ri i akademik Sabri Hamitit që sot ka dalë nga shtypi. Monografia për poetin kombëtar dhe romantikun e madh shqiptar, Naim Frashëri, është botuar në 120-vjetorin e shkuarjes së tij në amshim. Sipas Hamitit, në librin prej 170-faqesh thuret profili i shkrimtarit të dashur e të adhuruar të letërsisë shqipe, i cili kishte arritur statusin e pakontestueshëm të poetit kombëtar, por që për vite kishte qenë edhe i censuruar nga diktatura.

“Poezia e Naimit është gjuha shqipe e shpirtëruar me pamje të dashurisë”, shkruan Sabri Hamiti në tekstin nistor të monografisë, duke konstatuar se, “edhe pse me Naimin na ndan një shekull, gjuha e poezisë së tij mbetet frymëzim edhe sot si dikur”.

Ligjëruesja dhe studiuesja e letërsisë, Persida Asllani, librin “Naim Frashëri” e quan “Naim jete”, sepse “është një Naim jete, me një lexim të gjatë e ngulmues, shtresëzuar nga përvojat e thella të jetës, nga përvojat edhe më të thella të letërsisë, nga metodologjitë studimore dhe kritike të subjektivizuara e sidomos nga një përsosje e pashoqe ndër vite e shkrimit për poetin dhe poezinë, si finalitet fundor i çdo shkrimi për letërsinë. Sepse këtu synon të na kthejë ky libër i autorit, te zanafilla e Naimit, te gjuha e tij e zjarrtë, aty ku më parë Poradeci pat ndier poetikisht shenjtërinë e kombit, mendimin e frymëzuar, pasionet e jetës, poezinë e mirëfilltë dhe hyjninë”.

Ky është libri i dytë që ka botuar sivjet Sabri Hamiti. Para disa muajsh ka dalë libri i tij për epikun më të madh shqiptar, Gjergj Fishtën. Të dy librat janë rezultat i leximit sistematik që ua ka bërë Hamiti këtyre shkrimtarëve klasikë shqiptarë. /Epoka e re/

Lajme të sponsorizuara

Të fundit
Shkruan: Behxhet Sh. SHALA - BAJGORA 1. Sinqeriteti i pasinqertë:…