Përveç çiftit zviceran, Loredana Zefi ka marrë një tjetër akuzë nga avokati Valentin Landmann. Ai ka thënë se reperja ka përdorur një identitet të rremë për të mashtruar çiftin, duke u prezantuar si Anna Landmann, vajza e paligjshme e avokatit.

Duket se Loredanës i ka ardhur në mendje ky emër pasi më parë, avokati Landmann e ka mbrojtur vëllain e saj Fatonin në një çështje.

Ai ka marrë përsipër të mbrojë çështjen e Fatonit duke u munduar që të mos dëbohet nga Zvicra. Gazeta zvicerane “20 minuten” ka zbuluar se vëllai i Loredanës, Fatoni është dëbuar nga Zvicra pasi ishte dënuar 73 herë për vjedhje e mashtrime.

Madje, ai konsiderohej si “Eskobari i Emmenbrucke” pasi kishte nisur të shiste mariuanë që në moshën 15 ose 16-vjeçare.

Avokati Landmann nuk ia ka dalë të fitonte çështjen e tij më 23 maj 2016, zbulojnë disa dokumente nga Prokuroria e Luzernit.

Kujtojmë se Fatoni ishte pjesë e skemës së mashtrimit ndaj çiftit Z, i cili i ka marrë 6 900 franga Petrës dhe i thoshte vazhdimisht se do ia kthente. Avokati Landmann nuk ka bërë ende asnjë koment për lidhjen e mëparshme që kishte me familjen Zefi. /Ora News.tv/