Asamblistja Flora Musa – Islami braktis PDK-në, angazhimin e vazhdon si e pavarur
Asamblistja e Kuvendit Komunal të Ferizajt nga radhët e PDK-së, Flora MusaIslami, ka njoftuar se ka dhënë dorëheqje nga ky subjekt politik dhe është bërë e pavarur.
Flora Musa Islami ka njoftuar se këtë vendim e ka marrë si rezultat i mungesës së vlerësimit dhe respektit institucional ndaj angazhimit të saj të pandërprerë.
“Si gruaja më e votuar për dy mandate rradhazi, kam besuar se besimi juaj dhe kontributi im do të pasqyroheshin në proceset e vendimmarrjes brenda partisë. Për fat të keq, kjo pritje nuk është realizuar” – ka shkruar ajo në Facebook.
Asamblistja ka shkruar se si pasojë e mungesës së vlerësimit dhe respektit, distancimi bëhet një zgjidhje e natyrshme dhe parimore.
“Për këtë arsye kam vendosur ta vazhdoj angazhimin tim politik si e pavarur- duke përfaqësuar drejtpërdrejtë interesat e qytetarëve, e jo interesa të ngushta partiake”- tha më tej ajo.
Po ashtu Musa Islami falënderon qytetarët për përkrahjen, duke thënë se rruga vazhdon me përgjegjësi dhe përkushtim.
