Avokatja e Krasniqit: Ai nuk kishte pushtet të kontrollonte ushtarët
Në vazhdimin e fjalës hyrëse të mbrojtjes së Jakup Krasniqit, avokatja Venkateswari Alagendra, ka thënë se prokuroria e ka keqinterpretuar rolin e Krasniqit në UÇK dhe gjithë organizimin e kësaj ushtrie.
“Ai nuk ka qenë në një marrëdhënie hierarkike me autorët fizikë të krimeve. Ai nuk kishte aftësi për të kontrolluar në mënyrë efektive ndonjë ushtar”, ka thënë Alagendra.
Sipas saj, prokuroria ka dështuar ta bëjë lidhjen e krimeve të pretenduara me vendndodhjen fizike të Krasniqit nëpër periudha të ndryshme kohore gjatë vitit 1999.
Alagendra ka deklaruar se “prokuroria duket sikur është bërë pjesë e propagandës kundër UÇK-së”.
“Provat do të tregojnë se organizimi i UÇK-së ishte i ndryshëm në vende të ndryshme dhe kohë të ndryshme”, ka thënë ajo, duke shtuar se UÇK-ja asnjëherë nuk ka pasur një hierarki vertikale të komandës.
