Bahtiri nënshkroi kontratat për bursa me 52 studentë

01 korrik 16:50

Në sallën e Kuvendit Komunal të Mitrovicës, kryetari Agim Bahtiri, ka nënshkruar kontratat për bursa me 52 studentë për vitin akademik 2019/2020.

Me rastin e nënshkrimit të kontratave ishin të pranishëm edhe nënkryetari Faruk Mujka, dhe drejtoresha e Administratës, Valmire Sylejmani.

Në fjalën e tij para studentëve, Bahtiri ka thënë se ndihet krenar që kanë përfituar bursa të gjithë studentët të cilët kanë plotësuar kriteret, dhe se kjo mbështetje financiare do t’ua lehtësojë sadopak obligimet familjarëve të tyre, në mënyrë që studentët të fokusohen në aspektin e studimeve drejt realizimit të qëllimeve dhe aspiratave të tyre.

“Është kënaqësi e veçantë që jam sot në mesin tuaj, dhe unë çdoherë do të jem mbështetës i njerëzve të cilët e duan vendin e tyre, dhe këtë jeni duke e dëshmuar me suksesin tuaj, pasi që keni arritur të jeni përfitues të bursave komunale dhe jeni studentë të dalluar, jeni ardhmëria e qytetit tonë dhe sigurisht përpos ngritjes profesionale, nesër edhe ndonjëri prej jush do të jetë në pozita udhëheqëse si në aspektin e nivelit lokal ashtu edhe në atë qendror, në fushat e ndryshme. Andaj ju inkurajoj që të mësoni e studioni për të ngritur diturinë tuaj që në të ardhmen të bëheni profesionistë të vërtetë”, ka thënë Bahtiri.

Pas nënshkrimit të kontratave, studentët janë shprehur të jenë të kënaqur me ndarjen e këtyre bursave. Disa nga ata janë shprehur të jenë mirënjohës për mbështetjen që komuna po i’u ofron, si një motiv shtesë për të vazhduar studimet dhe një lehtësim financiar për familjet e tyre.

Lajme të sponsorizuara

Të fundit
Zyrtari financiar i ndërmarrjes “Trepça” ka dal pozitiv në testin…