Barcelona duket se ka humbur durimin në negociatat për transferimin e Julian Alvarez.

Klubi katalanas vazhdon ta konsiderojë sulmuesin argjentinas si objektivin kryesor për përforcimin e repartit ofensiv, por vështirësitë për të arritur një marrëveshje me Atletico Madridin kanë bërë që drejtuesit e Barcelonës të shqyrtojnë edhe alternativa të tjera.

Alvarez shihet si kandidati ideal për të marrë rolin e pasuesit të Robert Lewandowskit në majën e sulmit, mirëpo Atletico Madridi nuk ka ndërmend ta lejojë largimin e tij lehtësisht.

Klubi madrilen ka insistuar se sulmuesi argjentinas është pjesë e rëndësishme e projektit të skuadrës dhe nuk është në shitje.

Për këtë arsye, Barcelona ka nisur të shqyrtojë opsione të tjera në rast se transferimi i Álvarez dështon.

Drejtori sportiv i klubit, Deco, po punon për të gjetur një tjetër sulmues që mund të përshtatet me filozofinë e lojës së skuadrës së drejtuar nga Hansi Flick.

Në mesin e alternativave të përfolura është edhe Joao Pedro i Chelseat, për të cilin klubi anglez raportohet se është i gatshëm të dëgjojë ofertat.

Barcelona ende nuk e ka mbyllur derën për transferimin e Alvarezit, por drejtuesit katalanas tashmë po përgatiten edhe për skenarin në të cilin marrëveshja me Atlético Madridin nuk arrihet.