BERZh-i pret rritje ekonomike 4 për qind për Kosovën në vitin 2020

06 nëntor 16:44

Banka Ekonomike për Rindërtim dhe Zhvillim (BERZh) parasheh rritje ekonomike të moderuar në rajonin e Ballkanit Perëndimor në vitin 2020.

Rritja ekonomike në rajonin e Ballkanit Perëndimor ishte e dobët në gjysmën e parë të vitit 2019, me përjashtim të Kosovës dhe Maqedonisë së Veriut, sipas raportit të fundit të Prospektit Ekonomik Rajonal të BERZh-it.

Sidoqoftë, hyrja e investimeve të huaja direkte në rajon mbeti e fortë, duke përfituar nga vendndodhja e saj e favorshme gjeografike, forca e aftë e punës dhe kostot e pagave më të ulëta se në Evropën qendrore, është thënë në raport.

Në Evropën Juglindore pritet që ritmi i rritjes të ngadalësohet nga 3.3 për qind këtë vit në 3.0 për qind në vitin 2020, në përputhje me dobësimin e rritjes në eurozonë.

Në raportin e BERZh-it është thënë se rritja relativisht e fortë ekonomike ka vazhduar në vitin 2019 në Kosovë.

Pas 3.8 për qind të rritjes së GDP-së në 2018, ekonomia është zgjeruar me 4.2 për qind në vitin 2019.

Rritja është nxitur kryesisht nga investimet dhe konsumi privat, është thënë në raport. Në vitin 2019 dhe 2020, ekonomia pritet të rritet me 4.0 për qind në vit, me kërkesën e brendshme duke vazhduar të mbetet shtytësi kryesor, ka theksuar BERZh-i.

Në Shqipëri, pasi është ngritur në 4.1 për qind në 2018, rritja ekonomike është ngadalësuar në vitin 2019.

BERZh-i ka konsideruar se ekonomia shqiptare parashikohet të zgjerohet me 2.8 për qind në vitin 2019, e nxitur kryesisht nga konsumi privat, dhe do të rritet në 3.5 për qind në vitin 2020.

Rreziqet e brendshme për Shqipërinë përfshijnë detyrime të mundshme që rrjedhin nga programet e partneritetit publik dhe privat të padëshiruar dhe paqëndrueshmëria politike në vazhdim, është thënë në raportin e kësaj banke.

Lajme të sponsorizuara

Të fundit
Derbi në mes Ballkanit dhe Llapit përfundoi 1-1. Pas kësaj…