Besian Mustafa suspendon sekretarin e përgjithshëm, kryeshefin dhe pesë zyrtarë tjerë
Ministri në detyrë i Bujqësisë, Besian Mustafa, ka ndërmarrë hapa pas arrestimit të 10 zyrtarëve të kësaj ministrie, nën dyshimin për keqpërdorim me subvencione.
Mustafa ka suspenduar sekretarin e përgjithshëm të ministrisë, kreyshefin e agjencisë dhe 5 zyrtarë të tjerë
“Pas konfirmimit të aktakuzës nga Prokurori i Shtetit për keqpërdorim të detyrës zyrtare, kam suspenduar sekretarin e përgjithshëm të ministrisë, kreyshefin e Agjencisë dhe Zhvillimit Ekonomik dhe 5 zyrtarë të tjerë”, ka thënë Mustafa në një konferencë të jashtëzakonshme për medie.
Mustafa ka kërkuar që kjo çështje të shkojë deri në fund.
“Çdo gjë e kemi adresuar të institucionet e drejtësisë, ftoj organet e drejtësisë këtë çështje ta çojnë deri në fund. Mbetem të gatshëm të bashkëpunojnë”, ka thënë Mustafa.
Prokuroria e Shtetit ka konfirmuar se gjithsej nga aksioni i sotëm i Policës së Kosovës janë arrestuar 12 persona të dyshuar për rastin. Prej tyre janë 10 zyrtarë dhe dy qytetarë të thjeshtë.
Në anën tjetër, drejtori i Krimeve Ekonomike dhe Korrupsionit, Nazmi Sahiti ka deklaruar se janë vjedhur afro 400 mijë euro. Parat janë gjetur në shtëpitë e të dyshuarve.
Ndërsa kryeprokurori Aleksandër Lumezi, ka theksuar se aksione të tilla do të vazhdojnë edhe në ditët vazhdim.