Bie numri i fëmijëve të braktisur

17 nëntor 17:41

Numri i fëmijëve të braktisur çdo vit po shkon duke u zvogëluar. Në vitin 2018 kishte 28 raste të braktisjes të fëmijëve dhe nga janari deri në shtator të këtij viti janë evidentuar vetëm 22 raste.

Sipas të dhënave që posedon Ministria e Punës dhe Mirëqenies Sociale, del se numri i fëmijëve të braktisur çdo vit po shkon duke u zvogëluar.

Në vitin 2014, janë evidentuar 41 raste, në vitin 2015, 43 raste, në vitin 2016, 36 raste, në vitin 2017, 34 raste, në vitin 2018, 28 raste dhe nga janari deri në shtator të këtij viti janë evidentuar 22 raste.

Ministria e Punës dhe Mirëqenies Sociale, ka bërë me dije se strehimi i këtyre fëmijëve është një formë alternative e mbrojtjes së përkohshme dhe afatshkurtër për fëmijët e kësaj kategorie, për shkak se Republika e Kosovës që nga periudha e pasluftës nuk ka ndërtuar dhe rindërtuar asnjë jetimore.

Besnik Peci, udhëheqës i kujdesit alternativ për fëmijët që janë të strehuar në “Fshatin Sos”, ka thënë se ata kanë kujdesin intensiv nga “SOS Nëna”, një grua e cila nuk ka obligime familjare jashtë “SOS Fshatit” dhe ka vendosur të punojë dhe të përkushtohet për rritjen e fëmijëve të cilët i besohen asaj.

Ndërsa gjatë ditës, javës dhe vitit ata marrin shërbime sistematike prej psikologut, punëtorit social dhe pedagogut.

Peci për “KosovaPress”, ka thënë se aktualisht në “Fshatin Sos” janë të strehuar 60 fëmijë, të cilët marrin të gjitha shërbimet që i mundësojnë atyre fëmijëve të rritën në mënyrë të mirëfilltë si të gjithë fëmijët e tjerë.

Ndërsa drejtori i Neonatologjisë, Xhevdet Gojnovci, ka thënë se në repartin e tyre ka foshnje të cilat prindërit i braktisin ditën që i lindin dhe që policia së bashku me Ministrinë e Punës dhe Mirëqenies Sociale i dërgojnë nga tereni.

Sipas tij, të gjitha këto foshnje në klinikë qëndrojnë 28 ditë, ku edhe i marrin shërbimet e duhura, pastaj i referohen Qendrës për Punë dhe Mirëqenie Sociale.

Lajme të sponsorizuara

Të fundit
Kombëtarja e Portugalisë është kualifikuar në “Euro 2020” pas fitores…