Deputeti i AAK-së, Lahi Brahimaj, ka deklaruar se kryeministri në detyrë, Albin Kurti, nuk e përballon mundësinë që Glauk Konjufca të marrë mbështetjen e 61 deputetëve për të udhëhequr Qeverinë e Kosovës.

Në një intervistë për emisionin “Mesditë” në “Tëvë1”, Brahimaj ka thënë se vendi duhet të shkojë sërish në zgjedhje nacionale, pasi sipas tij Kurti nuk është i interesuar të formojë institucionet.

Më tutje, Brahimaj ka ripërsëritur se AAK-ja nuk do të hyjë në koalicion me asnjë parti politike.

“Ishte vlerësim i Haradinaj, por edhe e kryesisë që ftesa e Konjufcës nuk ishte e sinqertë ishte vetëm sa për të provuar diçka. Kurti në asnjë anë nuk e përballon që Konjufca t’i merr 57 vota e le më 61 vota. Ne nuk shohim diçka adekuate me këtë qeveri, zgjidhja më e mirë është me shkua në zgjedhje. Kurti mashtron sepse nuk është i interesuar për të ndërtuar institucione. Aleanca të gjitha komunat i fitoj bindshëm dhe ishte vendim i kryesisë që të shkojmë në zgjedhje vetëm, nuk jemi të interesuar të bëjmë koalicion me asnjë parti”, ka deklaruar Brahimaj.