‘Dardanët’ besojnë në fitore

25 nëntor 2021 | 08:17

Përfaqësuesja e Kosovës në basketboll sonte (e enjte) përballet me Norvegjinë në udhëtim. Sfida zhvillohet në Bergen të Norvegjisë nga ora 19:00.

Ky takim zhvillohet në kuadër të parakualifikimeve për FIBA “Eurobasket 2025”.

Basketbollistët e Kosovës në fundjavë u stërvitën në Prishtinë, kurse të hënën udhëtuan drejt Norvegjisë, ku të martën zhvilluan stërvitjen e parë.

Atmosfera në kampin e “dardanëve” është shumë e mirë dhe shpresohet se do të nxirret rezultat pozitiv. Në Grupin C bën pjesë edhe Danimarka. Vendi i parë kualifikohet tutje, edhe vendi i dytë më i mirë nga të tri grupet parakualifikuese. Katër kombëtare kualifikohen në rrethin e dytë parakualifikues.

Kjo është hera e parë që përballen Norvegjia dhe Kosova. Vendasit kanë vënë në dispozicion 1 200 bileta për takimin e parë në shtëpi pas 20 vjetësh. Shqiptarët që jetojnë në Norvegji, biletat mund t’i gjejnë në faqen zyrtare të Federatës Norvegjeze (basket.no).

“Do t’u qasemi ndeshjeve një nga një. Ne besojmë në rezultate pozitive. Është e rëndësishme atmosfera në ekip dhe të bëjmë më të mirën tonë për të fituar. Janë dy ndeshje me rëndësi në një rrugëtim të gjatë”, është shprehur Christos Marmarinos, përzgjedhës i Kosovës para ndeshjes ndaj norvegjezëve.

Kapiteni Dardan Berisha është shprehur se do ta japin maksimumin, kurse Erjon Kastrati, Gëzim Morina dhe Drilon Hajrizi kanë theksuar se do të japin më të mirën e tyre për rezultate pozitive. Kosova, pas Norvegjisë, do të përballet me Danimarkën në Prishtinë, më 28 nëntor, me fillim nga ora 19:00.

Lajme të sponsorizuara

Të fundit
Kryetari në detyrë i Kamenicës, Qëndron Kastrati ka folur për…