SHBA- Ish-agjenti i lartë i FBI-së, Charles McGonigal është dënuar me më shumë se 4 vjet burg për ndihmën e një oligarku rus që kërkonte të hiqej nga një listë sanksionesh amerikane. 55-vjeçari, u deklarua fajtor në muajin gusht për një akuzë për komplot për pastrim parash.

McGonigal është një nga agjentët më të lartë të FBI-së që është akuzuar ndonjëherë për një krim, raporton ‘BBC’. Ai akuzohet gjithashtu se ka fshehur 225,000 dollarë (176,000 £) në pagesa nga një agjent shqiptar, ndërsa punonte ende për FBI-në. Prokurorët kishin kërkuar pesë vjet burg për çështjen e Nju Jorkut, ndërsa McGonigal nuk kishte kërkuar kohë pas hekurave. McGonigal ishte agjenti special i ngarkuar me divizionin e kundërzbulimit të FBI-së në Nju Jork përpara se të tërhiqej në vitin 2018. Në atë rol, ai kishte për detyrë të hetonte oligarkët rusë.

Para se të jepej dënimi i tij me 50 muaj, McGonigal shprehu keqardhje për veprimet e tij.

“Kam kryer një krim dhe si ish-agjent special i FBI-së më shkakton dhimbje ekstreme emocionale dhe fizike,” ai i tha gjykatëses Jennifer Rearden, sipas ABC News.

“Unë qëndroj para jush sot me një ndjenjë të thellë pendimi.”

Rearden tha se McGonigal kishte dhënë “kontribute të jashtëzakonshme”; përmes punës së tij kundër spiunazhit, por krimet e tij i quajti “jashtëzakonisht të rënda”.

Ai është urdhëruar të dorëzohet tek autoritetet më 26 shkurt 2024.

Ai shërbeu si agjent special i ngarkuar me Divizionin e Kundërzbulimit të zyrës fushore të FBI-së në Nju Jork. Në atë pozicion, McGonigal mbikëqyri dhe mori pjesë në hetimet e oligarkëve rusë, duke përfshirë Oleg Deripaska, të cilëve u ofronte shërbime të palejueshme.