Dogana mbledh mbi 1.7 miliardë euro për 10 muaj, ja sa u rritën të hyrat
Dogana e Kosovës ka mbledhur mbi 1.7 miliardë euro gjatë 10 muajve të parë të vitit 2026, duke shënuar rritje prej 5.7 për qind krahasuar me periudhën e njëjtë të vitit të kaluar.
Sipas të dhënave të publikuara nga Dogana, gjatë periudhës janar–tetor 2026, të hyrat arritën në 1 miliard e 708 milionë e 243 mijë euro, nga 1 miliard e 615 milionë e 537 mijë euro sa ishin në periudhën përkatëse të vitit 2025.
Kjo nënkupton se Dogana ka mbledhur rreth 92.7 milionë euro më shumë sesa në 10 muajt e parë të vitit të kaluar.
Rritje është regjistruar në të gjitha kategoritë kryesore të të hyrave doganore.
Sipas njoftimit, të hyrat nga Tatimi mbi Vlerën e Shtuar (TVSh) janë rritur me 7.8 për qind, ato nga taksa doganore me 6.6 për qind, ndërsa të hyrat nga akciza kanë shënuar rritje prej 1.8 për qind.
Dogana e Kosovës ka vlerësuar se këto rezultate pasqyrojnë angazhimin e vazhdueshëm në mbledhjen e të hyrave, zbatimin e legjislacionit doganor dhe mbështetjen e zhvillimit ekonomik të vendit.



