Drejtuesit e BQK-së dhe BKS-së takojnë zyrtarët e lartë të Këshillit të Byrove në Bruksel
Guvernatori i Bankës Qendrore të Republikës së Kosovës (BQK), Fehmi Mehmeti, i shoqëruar nga Sami Mazreku, drejtor i Byrosë Kosovare të Sigurimit (BKS) kanë zhvilluar një takim me udhëheqësit e Këshillit të Byrove në Bruksel (COB), e cila është organizatë menaxhuese e sistemit të Kartonit të Gjelbër.
Delegacioni i Kosovës, gjatë takimit me drejtoreshën menaxhuese të COB-it, Greet Flore, e ka informuar atë mbi përgatitjet që Byroja Kosovare e Sigurimit, së bashku me Bankën Qendrore të Republikës së Kosovës dhe institucione të tjera të interesit, ka ndërmarrë deri më tani në lidhje me kërkesat që lidhen me procesin e anëtarësimit në COB, si dhe për gatishmërinë për të ndërmarrë hapa të tjerë në këtë drejtim.
Mehmeti dhe Mazreku, kanë nënvizuar angazhimin e tyre dhe të Republikës së Kosovës për të forcuar sistemin financiar duke krijuar kapacitete të nevojshme për të siguruar gatishmërinë e Byrosë Kosovare të Sigurimit për të plotësuar çdo detyrim që rrjedh nga zbatimi i sistemit të Kartonit të Gjelbër, duke u bazuar në standardet e njohura ndërkombëtarisht që e rregullojnë këtë fushë.
Bazuar në raportin e prezantuar nga drejtori i Byrosë Kosovare të Sigurimit, Kosova ka arritur një sërë objektivash të rëndësishme, duke nënvizuar se BKS-ja ka ulur në mënyrë të ndjeshme numrin e automjeteve të paregjistruara dhe vazhdon të zbatojë memorandumet e bashkëpunimit me vendet e rajonit.
Më tutje, guvernatori Mehmeti dhe drejtori Mazreku, kanë theksuar angazhimin e Kosovës për të bashkëpunuar për të gjetur një zgjidhje sa i përket lehtësimit të trafikut ndërkufitar në mes të Kosovës dhe vendeve të tjera. Në këtë kontekst, ata kanë kërkuar bashkëpunim nga COB-ja.
Ndërsa drejtoresha menaxhuese të COB-it, Greet Flore, ka theksuar se mundësitë për bashkëpunim do të vlerësohen në mënyrë rigoroze në zbatim të rregullave në bazë të së cilave funksionon organizata që drejton.