Dyqanet e Louis Vuitton dhe Apple ishin të parat që u vandalizuan në Minnesota dhe tani urrejtja që la pas vdekja e George Floyd po çon gjjthnjë e më shumë në kaos shtetet amerikane.

Sot është dita e pestë e protestës dhe aktet e dhunës janë rritur. Protestuesit po qëllohen me plumba gome nga policët, teksa ata djegin e shkatërrojnë godina, dyqane brendesh dhe kompanish të mëdha.

Në videon e postuar nga mediat amerikane tregohet se si protestuesit po djegin e po shkatërrojnë makinat luksoze të Mercedes Benz në Kaliforni. Disa prej tyre po i lyejnë me bojë të kuqe ku shkruajnë mesazhe kundër racizmit. Të tjerë shihen sipër makinace duke goditur me shkopinj xhamat.

George Floyd ishte një 49 vjeçar afroamerikan i cili u fut në një dyqan për të blerë, por ai përdori një kartëmonedhë false 20 dolarëshe. Pas denoncimit nga shitësi, policia shkoi për ta ndaluar, por ai u tërhoq me forcë nga makina dhe u shtri në tokë. Një prej oficerëve i vendosi gjurin në qafë deri kur ai dha frymën e fundit.

Ekspertiza e nxorri shkakun e vdekjes pikërisht nga akti makabër i oficerit dhe për shkak të një problemi në zemër. Protestuesit kanë lëshuar mesazhe kundër racizimit dhe dënojnë faktin se oficeri i policisë u arrestua pas katër ditësh nga ngjarja e rëndë. Ai tashmë akuzohet për vrasje të shkallës së tretë.