Kryetari i Komunës së Mitrovicës, Faton Peci, ka mbajtur takimin publik me qytetarët për prezantimin e punës gjatë gjashtëmujorit të parë të vitit 2026.

Në këtë takim morën pjesë nënkryetari, Enis Osmani, drejtorët e drejtorive komunale, përfaqësues të lagjeve dhe fshatrave, qytetarë, si dhe pjesëmarrës të tjerë.

Gjatë takimit u prezantuan punët, të arriturat dhe projektet e realizuara gjatë kësaj periudhe, projektet që janë në proces të zbatimit, si dhe ato që pritet të nisin së shpejti.

Kryetari Peci falënderoi të gjithë qytetarët për pjesëmarrjen e konsiderueshme, për vlerësimin e punëve të kryera, si dhe për propozimet, kërkesat dhe kritikat konstruktive të paraqitura gjatë diskutimit.

Ai theksoi se qeverisja e mirë lokale bëhet vetëm në bashkëpunim me qytetarët, dhe se do të vazhdojnë konsultimet me ta për interesin publik.