Federata e Karatesë së Kosovës (FHK), në përvjetorin e legjendës së karatesë, Xhevat Makolli e ka nderuar ish-deputetin Hisen Berisha me mirënjohje për kontribut e madh në rrugëtimin për çlirimin e vendit si dhe me rrugëtimin si veteran i karatesë në kohën e okupimit.

Ish-komandanti Hisen Berisha e ka falënderuar FHK-në për këtë mirënjohje të sinqertë.

Berisha ka thënë se ky është një nderim i veçantë për të, pasi vjen nga një komunitet që ai kurrë nuk e ka ndarë sportin nga përkushtimi ndaj atdheut.

“Në një kohë kur sporti nuk ishte luks, por rezistencë, kur sallat e stërvitjes nuk ishin thjesht hapësira për gara, por qendra përgatitjeje shpirtërore, fizike dhe kombëtare — karateja për ne nuk ishte vetëm disiplinë, por mision”, ka shkruar Berisha.

Postimi i plotë i Berishës:

Faleminderit për Federatën e Karatesë së Kosovës

Dua të shpreh falënderimin tim të thellë dhe mirënjohjen e sinqertë për Federatën e Karatesë së Kosovës, që në përvjetorin e Xhevat Makollit — mjeshtrit dhe legjendës së karatesë sonë kombëtare — më nderoi me mirënjohje për kontributin në çlirimin e Kosovës dhe për rrugëtimin tim si veteran dhe mjeshtër i karatesë në kohët e okupimit.

Ky nderim ka një peshë të veçantë për mua, sepse vjen nga një komunitet që nuk e ka ndarë kurrë sportin nga përkushtimi ndaj atdheut. Në një kohë kur sporti nuk ishte luks, por rezistencë, kur sallat e stërvitjes nuk ishin thjesht hapësira për gara, por qendra përgatitjeje shpirtërore, fizike dhe kombëtare — karateja për ne nuk ishte vetëm disiplinë, por mision.

Në ato vite të errëta, kur shtypja serbe synonte të shkatërronte çdo shenjë të organizimit dhe dinjitetit shqiptar, ne përdorëm gjithçka që kishim në dorë për t’u përgatitur. Shkathtësitë luftarake të karatesë u kombinuan me artin ushtarak tradicional, dhe u bënë pjesë e trajnimit të luftëtarëve të ardhshëm të UÇK-së. Stërvitjet tona nuk ishin vetëm për teknikë, por për karakter. Ishin për trupin, por edhe për shpirtin.

Të përmendesh e të nderohesh në një ngjarje që mban emrin e Xhevat Makollit është për mua më shumë se vlerësim — është përgjegjësi për të ruajtur, përkujtuar dhe trashëguar rrugën që ai dhe shumë të tjerë na e trasuan me mund, disiplinë dhe dashuri për atdheun.

Falënderoj Federatën për këtë akt nderimi që më rikujton se sakrifica, rezistenca dhe sporti si pjesë e luftës për liri nuk harrohen. I përkulem me respekt të gjithë atyre që nëpërmjet karatesë dhe sporteve të tjera luftuan për identitet, për liri dhe për dinjitet kombëtar.

Lavdi të gjithë atyre që i shndërruan sallat e sportit në arena të qëndresës.

Lavdi atyre që nga karateja kaluan në rreshtat e UÇK-së.

Lavdi dëshmorëve.

Zoti e bekoftë sportin, rininë e sportdashësit që u bënë pjesë e historisë sonë të lavdishme!