Gara e Montakarlos që zhvillohet këtë javë është një shans i mirë për Ferrarin për ta ndalur hegjemoninë e Red Bullit dhe fituar në një pistë ku konsumi i gomave nuk është problem.

Charles Leclerc me “kokëkuqen” ka siguruar dy “pole position” radhazi në dy garat e fundit, por që s’i ka kthyer në fitore.

“Do të garojmë në Montekarlo, në shtëpinë e Charles dhe për të është një garë e veçantë. Por edhe për ne. Bashkë me Charles e kemi përgatitur këtë garë në detajet më të vogla, për të shfrytëzuar çdo mundësi që na ofron pista”, ka thënë Frederic Vasseur, shef i Ferrarit.

“Një pistë qytetare e ngushtë, me pak mundësi parakalimi, por të dy pilotët tanë e duan këtë cirkuit. Leclerc ka siguruar ‘pole’ vitet e fundit, ndërsa Sainz ka qenë në podium, pra është një pistë që na përshtatet. Do ta japim maksimumin për të marrë një fitore për t’ua dedikuar tifozëve”, ka thënë Vasseur.