Ka filluar finalja e Ligës së Kampionëve për edicionin 2021/22 në “Stade de France” të Parisit ku Liverpooli i Jurgen Kloppit dhe Real Madridi i Carlo Ancelottit kërkojë trofeun më të vlefshëm në futboll.

Fillimi i kësaj ndeshje finale është shtyrë 36 minuta për shkak se tifozët e Liverpoolit nuk kishin arritur që të hyjnë në stadium, teksa mijëra ulëse kishin mbetur të zbrazta.

Deri në finale, Liverpooli eliminoi Interin, Benficën dhe Villarrealin, kurse nga skuadra spanjolle janë eliminuar Chelsea, Paris Saint-Germaini dhe Manchester City. Trajneri Jurgen Klopp ka bërë me dije se mezi po presin të luajnë në këtë ndeshje ndaj një kundërshtari tepër të vështirë.

“Ne me të vërtetë presim me padurim këtë ndeshje kundër një kundërshtari tepër të fortë, kundërshtari më me përvojë që mund të merrni në këtë kompeticion. Nuk mendojmë se nuk do të na interesonte kjo, sepse fituam dy gara tani dhe ishim afër në një garë të tretë. Kjo, natyrisht, nuk është kështu. Asnjëherë nuk e dini se sa shpesh do të arrini një finale të Ligës së Kampionëve, kështu që më mirë përdorni ato pak mundësi që ju jepni. Për ne tani është vërtet e veçantë, hera e tretë në pesë vjetët e fundit. Kjo është vërtet e veçantë me këtë grup”, ka thënë Klopp, i cili hodhi poshtë fjalët për hakmarrje lidhur me finalen e vitit 2018.

“Ajo ishte një natë e ashpër për ne, ishte vërtet e vështirë për t’u marrë duke pasur parasysh rrethanat, mënyrën se si pësuam golat dhe sigurisht dëmtimi i Salahit. Unë nuk besoj në hakmarrje. Edhe unë e kuptoj atë, thjesht nuk mendoj se hakmarrja është një ide fantastike. Unë e kuptoj që Salah tha se dëshiron ta rregullojë atë, dhe unë dua ta rregulloj atë. Por, gjithçka është mirë mes meje dhe nesh dhe Real Madridit. Nëse fitojmë, nuk do të jetë për shkak të asaj që ndodhi më 2018”, ka shtuar Klopp.

Ndërsa trajneri i Realit të Madridit, Carlo Ancelotti, po përgatitet për finalen e tij të pestë në Ligën e Kampionëve. Trajneri italian ka thënë se finalja është mes dy skuadrave të mëdha dhe ajo që do të ketë më shumë kurajë e personalitet do të fitojë.

“Nëse Liverpooli po mendon revanshin për finalen e humbur në vitin 2018, te Reali po mendojnë për revanshin në finalen e humbur në vitin 1981. Për më shumë që luhet po në të njëjtin vend, në Paris. Unë mendoj se këto tema më së shumti janë gazetareske. Unë di të them se përballë do të jenë dy skuadra të mëdha dhe ajo që do të ketë më shumë kurajë e personalitet do të fitojë. Për më shumë përballë do të kemi një trajner të shkëlqyer si Kloppi, me të cilin kemi marrëdhënie mjaft të mira. Një trajner që ka sjellë gjëra të reja në futboll”, ka thënë Ancelotti.