Kopiliqi i Poshtëm në Skenderaj, në mungesë të rrjetit të kanalizimit, qëmoti është ballafaquar me problemin e ujërave të zeza, i cili tashmë po zgjidhet me projektin e ndërtimit të rrjetit të kanalizimit me gjatësi 20 kilometra, e që do t’i përfshijë të gjitha lagjet e këtij fshati.

Me këtë rast, kryetari i komunës së Skenderajt, Bekim Jashari, ka thënë se pas ndërtimit të rrjetit të ujësjellësit vitin e kaluar, përkrahjen e fermerëve me grante, zgjerimin e lumit, ndërtimin e rrugëve në lagje dhe tani ndërtimin e rrjetit të kanalizimit, po kompletohet infrastruktura e nevojshme në këtë fshat duke dëshmuar përkushtimin tonë maksimal në shërbim të qytetarëve.

“Vitet në vazhdim do të orientohemi për furnizimin e rregullt me ujë të pijshëm përmes projektit të Brusit, punësimit të të rinjve, përkrahjes edhe më të madhe për fermerët, vazhdimin e zgjerimit të lumit, renovimin e shkollës, ndërtimin e poligonit sportiv, trotuarit e ndriçimit publik në rrugët kryesore, ndërtimin e rrugës Kopiliq – Turiqec, rrugicave që janë të parapara me projektin ‘Izbica 2’ si dhe projekte të tjera sipas kërkesave të qytetarëve”, ka thënë Jashari.