Gjykimi i Salih Mustafës, IKD-ja: Modifikimi i zërit ka bërë që deklaratat e dëshmitarit të jenë të pakuptueshme

20 shtator 16:18

Instituti i Kosovës për Drejtësi (IKD) i ka vlerësuar të pakuptueshme deklaratat e dëshmitarëve në Dhomat e Specializuara të Kosovës (DhSK) në Hagë.

Nga IKD-ja ka theksuar se modifikimi i zërit të dëshmitarëve është i tepruar dhe ka bërë që deklaratat, sipas tyre, të jenë pothuajse të pakuptueshme.

“Një gjë e tillë e ka bërë të vështirë për publikun, për pjesën ku është e hapur seanca, që të informohet mbi zhvillimet në DhSK, si dhe për mediat që të raportojnë saktë për deklarimet e dëshmitarëve pranë Speciales” është thënë në reagimin e IKD-së.

Më tutje, IKD-ja ka shpjeguar se identiteti i dëshmitarëve, marrë parasysh edhe masat tjera mbrojtëse, mund të sigurohet edhe pa e modifikuar zërin kaq substancialisht sa, sipas tyre t’i humbasë kuptueshmëria.

Reagimi i plotë i IKD-së:

Në Dhomat e Specializuara të Kosovës (DhSK) në Hagë, të hënën, ka nisur dëgjimi i dëshmitarit të parë në gjykimin për krime lufte ndaj ish-pjesëtarit të Ushtrisë Çlirimtare të Kosovës (UÇK), Salih Mustafa.

Për mbrojtjen e identitetit të dëshmitarit me kodin W03593, në mënyrë që i njëjti të mos mund të identifikohet, pamjet janë bërë të turbullta dhe zëri i tij është modifikuar.

Megjithatë, modifikimi i tepruar i zërit ka bërë që deklaratat e dëshmitarit të jenë pothuajse të pakuptueshme. Një gjë e tillë e ka bërë të vështirë për publikun, për pjesën ku është e hapur seanca,  që të informohet mbi zhvillimet në DhSK, si dhe për mediat që të raportojnë saktë për deklarimet e dëshmitarëve pranë Speciales.

Instituti i Kosovës për Drejtësi (IKD) e mbështetë mbrojtjen e identitetit të dëshmitarëve në raste të tilla pranë DhSK.  Për aq sa seanca është e hapur, IKD konsideron se publiku i gjerë duhet të jetë në gjendje të dëgjojë deklarimet e dëshmitarëve. Në këtë drejtim, identiteti i dëshmitarëve, marrë parasysh edhe masat tjera mbrojtëse, mund të sigurohet edhe pa e modifikuar zërin kaq substancialisht sa t’i humbasë kuptueshmëria.

Duke qenë se identiteti i dëshmitarëve mund të mbrohet edhe pa modifikuar zërin skajshmërisht, IKD bën thirrje që deklarimet e dëshmitarëve në seancat e radhës të jenë më të kuptueshme për publikun e gjerë.

Megjithëse jo për identitetin e tyre, publiku ka të drejtë të jetë i informuar saktë mbi deklarimet e dëshmitarëve, në procese të tilla penale me interes të gjerë publik.

Lajme të sponsorizuara

Të fundit
Ish-deputeti i Kuvendit të Kosovës, Dukagjin Gorani, ka thënë se…