Halimi heshti gjatë, por “Ëndrra, shi dhe lule” po i pritet mirë

03 korrik 20:18

Poeti Fadil Halimi, i cili në vitet nëntëdhjetë botonte shpeshherë poezi në revistën “Jeta e re”, në fund të muajit maj të këtij viti ka botuar librin me poezi “Ëndrra, shi dhe lule”, i cili, sipas redaktorit të librit, Imer Topanica, poezitë e këtij libri risjellin copëza, sekuenca dramash, çaste ekzaltimi, ngazëllimi e pikëllimi nëpër të cilat ka kaluar shpirti poetik. “Në kuptimin e kontekstit kohor, disa vargje u takojnë akteve krijuese shumë të hershme, të artikuluara e të publikuara nëpër revista letrare, këtu e disa dekada”.

Sipas Topanicës, titulli “Ëndrra, shi dhe lule”, na e sugjeron një lloj leximi të tillë semantik, duke na paralajmëruar se nëpërmjet ëndrrës mund ta takojmë shpresën; nëpërmjet shiut, trishtimin; nëpërmjet metaforës së lules, dashurinë. “Gruaja, atdheu, nëna, babai, motrat, i biri etj., vijnë si trajta simbolikash nëpërmjet të cilave vihet gurthemeli i këtij kodi tematik”, ka shprehur mendimin Topanica.

Ndërkaq recensenti i parë i librit, Ahmet Selmani, ka veçuar toposin lirik të librit, duke shprehur se në këtë libër poetik “kemi të bëjmë me një rrafsh shpirtëror, ku ndodh mishërimi dhe trazimi emocional për gjërat e shtrenjta siç janë: njerëzit e afërt, e dashura, nëna, babai, vogëlushi, miqtë”.

Ndërkaq recensenti tjetër i librit, Xheladin Rexhepi, ka thënë se poezia e Halimit dallon nga arketipi i motiveve libreske, pa gjak, pa imagjinatë dhe fabul. “Kultivon një formë shprehëse poetike të lirshme, të dendur, si në aspektin motivues, ashtu edhe në metrikën e zgjedhur përtej skemave klasike”, ka konstatuar Rexhepi.

Shënime për autorin

Fadil Halimi lindi më 21 qershor 1965 në fshatin Dumnicë të Podujevës. Studimet për Letërsi dhe Gjuhë

Shqipe i ka mbaruar në Fakultetin e Filologjisë në Prishtinë. Ka punuar gazetar, korrespodent nga Podujeva në të përditshmet “Rilindja” dhe “Zëri”. Tash punon profesor në Shkollën e Mesme Teknike “Fan S. Noli” në Podujevë.

Në vitin 1992 ka botuar përmbledhjen me poezi “Proces në kafkë”, në NGBG “Rilindja” në Prishtinë.

Mbi bazën e motiveve të këtij libri, Teatri i Qytetit i Podujevës inskenoi shfaqjen teatrale “Ankth”, nën regji të Agron Gërgurit.

“Ëndrra, shi dhe lule” është libri i tij i dytë.

Lajme të sponsorizuara

Të fundit
Presidenti i Kosovës, Hashim Thaçi ka vizituar familjen e heroinës…