Hapet panairi “Prishtina 2019”, bëhet thirrje për siguri në punë

24 prill 2019 | 14:26

Është hapur Panairi i Përgjithshëm Ndërkombëtar “Prishtina 2019”, organizuar nga Oda Ekonomike e Kosovës (OEK), në bashkëpunim me Qeverinë e Kosovës.

Në këtë panair po marrin pjesë 100 ndërmarrje nga Kosova, rajoni dhe më gjerë.

Drejtori i Odës Ekonomike, Berat Rukiqi, ka deklaruar  se ashtu edhe siç është proklamuar ky vit do jetë vit i ekonomisë.

Ai ndër të tjera ka thënë se ka rritje të numrit të kompanive pjesëmarrëse në panair dhe bëri thirrje që fokusi për siguri dhe shëndet në punë të jetë më i madh. “Sot kemi 100 kompani nga shtetet më të rëndësishme nga rajoni dhe Evropa, ne besojmë që panairi është një nga mundësitë kryesore që të prezantojmë ekonominë tonë dhe korrespondon edhe me atë që e ka proklamuar Qeveria që ky vit do jetë vit i ekonomisë. Ajo që është thirrje duke u lidhur me rastet e fundit për shumicën e bizneseve është fokus më madh te siguria dhe shëndeti në punë prandaj të mos na përsëriten rastet që i kemi dhe besoj që ky është mesazh për panairin”, ka deklaruar Rukiqi.

Kryeministri i vendit, Ramush Haradinaj, ka thënë se ekonominë e bëjnë sipërmarrësit vendës dhe bëri thirrje për cilësi të produkteve.

Ai ka thënë se Qeveria ka filluar me qasje të re, duke u ofruar mundësi më të lehta dhe më të mira komunikimi kompanive. “Oda Ekonomike e Kosovës në bashkëpunim me Qeverinë prej datës 24 deri në 26 organizojnë panairin e përgjithshëm ndërkombëtarë Prishtina 2019. Shpejt në Kuvendin e Kosovës pritet të aprovohet ligji për tatimin që synohet përmirësimi i të bërit biznes. Politikat fiskale i kemi më të ulëta në Evropë, odat kanë brenda vetit arbitrazhet për zgjedhjet e kontratave. Tek zyra e kryeministrit kemi filluar një qasje të re që i kemi dhënë hapësirë komunikimit me kompanitë. Është vit i ekonomisë, por vitin e ekonomisë e bëjnë sipërmarrësit dhe ne do t’i qëndrojmë afër”, u shpreh Haradinaj.

Ministri i Tregtisë dhe Industrisë (MTI), Endrit Shala, ka deklaruar se MTI-ja ndër prioritetet kryesore ka mbështetjen e ndërmarrjeve në Kosovë dhe se të gjitha projektet e qeverisë dhe MTI-së kanë për qëllim mbështetjen e kompanive kosovare. “Institucionet kosovare janë të vetëdijshme për rolin e kompanive vendore. MTI-ja ndër prioritetet kryesore ka mbështetjen e ndërmarrjeve në Kosovë, të gjitha projektet e qeverisë dhe MTI-së kanë për qëllim mbështetjen e kompanive kosovare dhe i ftoj ata ta vazhdojmë dhe ta avancojnë  objektivin tonë. Këto janë sfida, por mund t’i realizojmë duke bashkëpunuar. Kërkoj nga ju që të vazhdoni të punoni në kualitet në mënyrë që ta rrisim tregun tonë dhe ta rrisim besimin e konsumatorëve tonë dhe të jashtëm. Ne jemi të përkushtuar t’ju përkrahim në këtë aspekt. Panairi paraqet një mundësi të mirë të sensibilizimit të akterëve për bashkëpunimin me qeverinë e Kosovës. MTI-ja çdo herë do jetë përkrahë bizneseve”, ka thënë  Shala.

Ndërkaq, ministri i Inovacionit dhe Ndërmarrësisë, Besim Beqaj, ka thënë se  Ekonomia Digjitale është e ardhmja e Kosovës. “Ajo çka jemi mbledhë këtu është të bëjmë ndërlidhjen ndërmjet traditës dhe gjërave të reja në botë, zhvillimet ekonomike janë duke u ndryshuar në mënyrë rapide. Ekonomia Digjitale është e ardhmja dhe Kosova ka fuqi të re punëtore. Kosova shpresoj që do ta krijon shumë shpejt identitetin e vet ekonomik dhe ai do jetë Inovacioni dhe Ekonomia Digjitale”, u shpreh Beqaj.

Lajme të sponsorizuara

Të fundit
Juventusi është në kërkim të një qendërmbrojtësi me eksperiencë, për…