Haradinaj, Hahnit: Kosova ka qenë e detyruar t’i vendos taksë Serbisë dhe Bosnjës

03 dhjetor 16:58

Kryeministri i Republikës së Kosovës, Ramush Haradinaj, ka pritur të hënë në takim komisionarin evropian për zgjerim, Johannes Hahn, me të cilin ka biseduar për zhvillimet politike dhe ekonomike në vend.

Me këtë rast, kryeministri Haradinaj, ka theksuar përkushtimin e Qeverisë së Kosovës për rrugën e integrimeve evropiane, për prioritetet në sundimin e rendit dhe të ligjit, përmbushjen e prioriteteve që dalin nga MSA, dhe për zhvillimin ekonomik.

Gjatë takimit, kryeministri Haradinaj ka vlerësuar se Kosova ka përmbushur të gjitha kriteret e vëna nga Bashkimi Evropian, duke kërkuar heqjen e regjimit të vizave për qytetarët e Kosovës, pasi me këtë do t’i hapej mundësi e mirë qytetarëve dhe bizneseve dhe Kosova do të jetë partner serioz për BE-në.

Kryeministri Haradinaj ka thënë se të gjitha institucionet e Kosovës janë të përkushtuara në zbatimin e reformave dhe të prioriteteve, dhe me këtë po dëshmojnë se integrimi evropian dhe avancimi i proceseve demokratike në vend është prioritet.

Në takim, është biseduar edhe për procesin e dialogut ndërmjet Republikës së Kosovës dhe Serbisë, për taksën e vendosur nga Republika e Kosovës ndaj produkteve me origjinë nga Serbia dhe Bosnja dhe Hercegovina, për të cilën kryeministri ka vlerësuar se Kosova ka qenë e detyruar të ndërmarrë këtë hap, pas pengesave të vazhdueshme që i ka bërë dhe vazhdon t’i bëj Kosovës në vazhdimësi, Serbia.

/Epoka e re/

Lajme të sponsorizuara

Të fundit
Ministrat e punëve të brendshme të vendeve anëtare të NATO-s…