I jepet lamtumira e fundit Lulëzim Krasniqit
I është dhënë lamtumira e fundit zyrtarit policor të Kosovës, Lulëzim Krasniqi, i cili ka ndërruar jetë në moshën 45-vjeçare.
Trupi i ish-ushtarit të UÇK-së, do të pushoj në varrezat e fshatit Zhilivodë të Komunës së Vushtrrisë.
Para varrimit, në shkollën e fshatit, është mbajtur një akademi përkujtimore, ku është vlerësuar lartë kontributi i Krasniqit në të kaluaren.
Në këtë akademi, përfaqësuesit e OVL-UÇK-së kanë vlerësuar se në kohën kur Kosova ishte në rrezik, Lulëzim Krasniqi, i ishte bashkuar radhëve të UÇK-së, ku disa herë kishte shkuar këmbë në Shqipëri për të marrë armë.
Ndërsa, përfaqësuesit e Policisë së Kosovës kanë vlerësuar lartë kontributin e Krasniqit në shërbim të rendit dhe ligjit.
Për punën e tij si polici i dalluar, Krasniqi kishte marr disa herë mirënjohje nga Policia e Kosovës.
Krasniqi për disa ditë ka qenë i shtrirë në QKUK për shkak të infektimit me Covid-19.
Lulëzim Krasniqi, në të kaluarën ka qenë edhe profesor, ndërsa ka qenë i pasionuar pas poezisë dhe alpinizmit.
Krasniqi pas vetës ka lënë bashkëshorten dhe tri vajza.