Aktori i famshëm, Arnold Schwarzenegger, ka zbuluar së fundmi se ai pothuajse vdiq gjatë një operacioni në zemër për shkak të një komplikacioni që iu shfaq.

Këtë e ka zbuluar përmes një video të postuar në “Youtube”. Ndërkohë CNN shkruan se Arnold raportoi se incidenti ka ndodhur në vitin 2019, pak para se të merrte pjesë në xhirimet e filmit “Terminator: Dark Fate”.

Ylli 76-vjeçar tha se ai iu nënshtrua një operacioni për zëvendësimin e valvulës dhe se kur u zgjua, mjekët e informuan se kishte ndodhur një gjakderdhje e papritur e brendshme. Ai u shpreh:

“Unë me të vërtetë u tremba. U zgjova dhe befas mjekët ishin para meje duke thënë: “Na vjen shumë keq, por nuk duket si ajo që kemi planifikuar. Ne bëmë një gabim dhe shpuam murin e zemrës, “dhe ata duhej të më hapnin shumë shpejt”.

“Përfundimi është se nuk mund ta kthesh kohën pas. Isha në mes të një fatkeqësie. Pra, tani si mund të shpëtoj prej saj? Ju duhet të ndryshoni marshin. Mblidhuni së bashku, ndërroni marshin dhe thoni, ‘OK, ajo që duhet të bëj tani është të dal nga ky spital‘, shtoi aktori.

Megjithatë, ai përmendi se donte të kthehej shpejt në formë për të xhiruar filmin dhe për t’i rikthyer rutinës së tij të përditshme. “Duhej të isha në formë, duhej të lëvizja, të vrapoja, të ngrija gjërat, të bëja skenat e luftimeve”, tha ai, duke shtuar se “qëndrimi pozitiv” dhe sistemi i tij mbështetës e ndihmuan atë të arrinte qëllimin e tij. “Në kohën kur fillova të xhiroja “Terminator 6”, u shërova plotësisht.