Kolegji AAB organizoi konferencën për evropianizimin në shtetet e Ballkanit Perëndimor
Mbi 100 pjesëmarrës nga vendi rajoni dhe bota, kanë prezantuar rreth 80 punime shkencore në kuadër të konferencës së dytë shkencore ndërkombëtare, që u mbajt virtualisht në Kolegjin AAB.
Konferenca “Evropianizimi, orientimi perëndimor dhe formimi i identitetit në shtetet e Ballkanit Perëndimor” u cilësua shumë e rëndësishme pasi Kosova po mëson rrugën e shteteve të anëtarësuara tashmë në Bashkimin Evropian.
Në hapje të konferencës, rektori i Kolegjit AAB, Bujar Demjaha ka thënë se organizimet e këtilla dëshmojnë përkushtimin dhe një nga prioritetet e mëdha të Kolegjit AAB për zhvillimin e shkencës.
“Besoj se kjo konferencë do të japë një kontribut të madh edhe jashtë kufirit të Kosovës për shkak se tema është komplekse dhe disi e mbulon territorin e Evropës Juglindore”, ka theksuar Demjaha.
Për rëndësinë e konferencës foli edhe prorektorja për kërkim shkencor, Uranela Demaj, e cila tha se kjo konferencë bëhet edhe më e rëndësishme për arsye se po i bënë bashkë disa partnerë shumë të shquar nga jashtë, kryesisht nga Bashkimi Evropian. “Për herë të parë në historinë e Kolegjit AAB e kemi partner edhe Universitetin e Bolonjës. Konferenca është e rëndësishme sepse përçon mesazhin e bashkimit dhe të ndërkombëtarizimit”, ka deklaruar Demaj.
Ndërsa prorektorja për bashkëpunim ndërkombëtar, Venera Llunji duke folur për organizimin e kësaj konference ka theksuar edhe rezultatet e pritshme të saj.
“Për ne ka shumë rëndësi të shohim se cilat janë qasjet të cilat ndikojnë dhe ndihmojnë në forcimin e identitetit të një shteti duke marrë parasysh që Kosova është shtet i ri. Asaj i duhet të krijojë identitetin e saj shtetëror, që do të thotë duhet të shohim se në çfarë rrugësh Kosova ecën që të jetë shtet i fortë në të gjitha aspektet e saj”, ka pohuar Llunji.
Në sesionin plenar të konferencës, i cili zgjoi interesim te pjesëmarrësit referuan emra të njohur të shkencës nga universitete prestigjioze në botë, si: Prof.dr. Raymond Detrez, Ghent University nga Belgjika, prof.dr. Pal Kolsto, University of Oslo nga Norvegjia, prof.dr. Ines Aquile Junyent, Catalonia University nga Spanja, e prof.assoc.dr. Besnik Pula, Virginia Tech, nga Shtetet e Bashkuara të Amerikës.
Konferenca “Evropianizimi, orientimi perëndimor dhe formimi i identitetit në shtetet e Ballkanit Perëndimor” zhvilloi punimet në 11 panele të veçanta, ku u trajtuan në aspektin shkencor problematika që kanë të bëjnë me çështje politike, ekonomike, kulturë, identitet, art, etj..