Komandanti i Komandës së Forcave të Bashkuara të NATO-s, në Napoli, James Foggo, ka theksuar se sipas gjendjes aktuale, NATO do të mbetet në Kosovë.

Ai ka deklaruar se do të ishte gjë e mirë sikur Serbia të dëshironte të bëhej anëtare e NATO-s, porse vetëm prej saj varet se çfarë niveli e thellësie të zhvillimit të bashkëpunimit dëshiron me Aleancën.

Foggo gjatë një interviste për portalin serb “European Western Balkans (EWB)” ka thënë se e sheh se bashkëpunimi midis Serbisë e NATO-s është në ngritje.

“Momentalisht jeni partner dhe vendi juaj është shumë i kënaqur me këtë. Edhe ne kjo na përgjigjet”, ka deklaruar ai.

Foggo ka thënë se Serbia, si partnere, ka zgjedhje të gjerë bashkëpunimi me NATO-n, që përfshin stërvitjet, manovrat, shkëmbimet, vizitat studimore, “1 600 gjera që mund t’i bëjë me NATO-n”.

“Kemi bërë gjitha ato gjera, ndërsa ju mund të zgjidhni çfarë dëshironi të bëni dhe në çfarë shkalle dëshironi të zhvilloni këto raporte, ndërsa ne jemi aty për ju. Kuptohet ne inkurajojmë Serbinë të bëjë më shumë dhe të zhvillojmë marrëdhëniet në mënyrë që ato të jenë më të forta”, është shprehur Foggo.

Duke folur për gjendjen në Kosovë, ai ka theksuar se një nga temat e bisedimeve që ka pasur me Ushtrinë e Serbisë, ka qenë nëse ka çfarëdo planesh për tërheqjen e KFOR-it ndërsa ai është përgjigjur se kjo varet nga rrethanat.

“Për aq sa raportet dhe qëndrueshmëria bëhen më të mira, ndërsa institucionet bëhen më demokratike dhe më të afta që të kujdesën për veten, një ditë NATO do të shqyrtojë zvogëlimin e pranisë së saj. Por sa i përket situatës aktuale, ne mbesim në Kosovë, ka thënë Foggo.