![](https://www.epokaere.com/wp-content/uploads/2023/08/konjufca.jpg)
Konjufca takohet me senatoren Fernandez: Nju Jorku, simbol i raporteve të historike Kosovë-ShBA
Kryetari i Kuvendit të Republikës së Kosovës, Glauk Konjufca, ka pritur në takim senatoren e shtetit të Nju Jorkut, Nathalia Fernandez.
Duke i uruar mirëseardhje në Republikën e Kosovës, kryetari Konjufca e ka njoftuar senatoren Fernandez për kontributin e pakrahasueshëm të Shteteve të Bashkuara dhe Shtetit të Nju Jorkut ndaj vendit tonë, si dhe për meritat e Senatit dhe Kongresit Amerikan në intensifikimin e bashkëpunimit dhe forcimin e marrëdhënieve ndërmjet shteteve tona.
Konjufca ka shprehur mirënjohje për punën e saj të jashtëzakonshme ndër vite me komunitetin e gjerë shqiptaro-amerikan në Nju Jork, komunitetin që, siç ka thënë ai është simboli më i mirë i raporteve të ngushta historike mes popujve tanë, interesave dhe synimeve tona të përbashkëta.
Fokus i bisedës ishin marrëdhëniet e shkëlqyera midis dy vendeve mike dhe aleate, si pikënisje nga ku merr kahje vazhdimësia dhe thellimi i mëtejmë i raporteve miqësore.